O PP de Culleredo leva a pleno a recuperación do Museo dos Molinos de Acea de Ama.

∙ Os populares demandan medios económicos e humanos para que o museo “volva abrir as súas portas canto antes”.

∙ Advirten do abandono sistemático cara aos bens patrimoniais de Culleredo por parte do goberno local.

O Partido Popular de Culleredo, a través do seu concelleiro José Antonio Golpe Faraldo, defenderá no próximo pleno unha moción para recuperar o Museo dos Molinos de Acea de Ama.

As instalacións que albergan o muíño de marea máis antigo de Galicia con máis de 800 anos, permanece pechado ao público, “a pesar da información errónea que se dá na páxina web do Concello, que está como a maioría dos bens patrimoniais de Culleredo: abandonada e desactualizada”, denuncia Golpe Faraldo.

O que seguramente sexa, xunto coa Torre de Celas, o ben histórico patrimonial máis importante do municipio, presenta actualmente un estado lamentable. “Entre os actos vandálicos de quen non respectan nada e a inacción por parte do Concello para poñer fin a este abandono, temos un museo infrautilizado do que deberiamos presumir e, con todo, está nun estado penoso”, sinala o edil popular.
Os populares teñen moi claro o que o museo necesita para volver ser un referente turístico-cultural de Culleredo. “Ademais da evidente reforma e acondicionamento da fachada e os arredores, débese dotar ao museo de contido atractivo para os visitantes, dinamizar as salas con exposicións periódicas, recuperar as visitas escolares que levan anos sen realizarse e, sobre todo, dotar ás instalacións dalgún sistema de vixilancia que protexa ao museo de posibles actos vandálicos”.

Desde o Partido Popular séguese apostando pola recuperación dos elementos etnográficos máis emblemáticos de Culleredo. “Un Concello que non coida e non pon en valor o enorme potencial natural e patrimonial que ten, está a privar aos seus veciños dunha riqueza cultural á que teñen todo o dereito de gozar e conservar”.